انت عالم ثاني بس عالم غريب
تختلف بعيوني عن باقي البشر
بيش اوصفك يا ارق واجمل ملاك
وبيك حارت ياحلو كل الصور
انت يكفي الليل من زاد الضلام
رسم وجهك بالسما وحطك قمر
انفجرت بخدودك اعيون العسل
والعسل من شاف وجهك انبهر
شالتك امك عشر اشهر بقيت
لان رسم شفايفك ظل بيها شهر
ومن اشوفك ترتجف اثنين ايديّ
والقلب دك بيّ ناقوس الخطر
وغامرت بعيوني ما اشوفك قلت
يوم يومين ورمش عيني انتحر
اني راح اصبر مثل صبر الفرات
حتى يتلاقى وي دجلة اشكد صبر
على الامل ظل يمشي من ابعد مكان
وشال حد البصرة بجفوفه المهر
ومن وصل ذاب بحضنها وصار شط
صار شط اسمه ونسى اسمه نهر